НАВРӮЗ

НАВРӮЗ
(дар ҳошияи тақвим)

Наврӯз рӯзи хилқати Инсон аст,
Рӯзи кушудани дари кайҳон аст.
Рӯзи шукуфтани гули Хуршед аст,
Рӯзи таваллуди маҳи Обон аст.
Наврӯз рӯзи тантанаи уммед,
Наврӯз рӯзи рӯйиши имон аст.
Рӯзи фуруд омадани фарвар,
Рӯзи фароз омадани Ҷон аст.
Наврӯз рӯзу соати мисоқ аст,
Ёдовари нахустин паймон аст.
Наврӯз рӯзи шустани лавҳи дил
Аз нақшҳои ботили шайтон аст.
Донӣ, чаро ба суфраи наврӯзӣ
Ойина дар баробари Қуръон аст?
То ки ба рӯйи хеш назар созӣ,
Рӯйи ту низ Мусҳафи Яздон аст.
Рӯзи фурӯғи ҷоми ҷаҳонбин аст,
Пайдоии нигини Сулаймон аст.
Шерозбанди маърифати Тӯрон,
Ойинаи тамаддуни Эрон аст.
Наврӯз рӯзи бастани Заҳҳок аст,
Рӯзи фирори галлаи девон аст.
Рӯзе, ки бод роиҳаи минуст,
Ҳар шоха хушку тар ҳама райҳон
аст.
Рӯзе, ки бо сухан натавон нозид,
Рӯзе, ки обу хок ғазалхон аст.
Рӯзе, ки баршумурдани авродаш
Дилсӯзтар зи чомаи Ҳассон аст.
Гар кор бандӣ, ин ҳама тадбир аст
В-ар ноз ҷӯйӣ, он ҳама афсонаст.
Наврӯз рӯзи адлу сахову ҷуд,
Наврӯз ҳамсиришти мусулмон аст.
Ҳар чиз ки Худо написандад, нест,
Маҷмӯаи худойписандон аст.
Наврӯз рамзи давлати Сомонист,
Кори ҷаҳон аз он чу ба сомон аст.
Рӯзе, ки ҳар куҳан бишавад тоза,
Дар бостон таровати бустон аст.
Боғи Нишоти хуррами Кашмир аст
Ҳар ҷой, ки шикаста биёбон аст…
***
Бозой, эй фариштаи фаррухпай,
Бозой, эй ки дар қадамат ҷон аст.
Бозой, ки ситода ба сад уммед
Дар остонаи ту кӯҳистон аст.
Минои субҳу он шафақ и рангин
Дар обгина лаъли Бадахшон аст.
Бозо ба даштҳои ҳазороняшт
Аз сабза сад саҳифаву девон аст. 
Бозову хуш хиром ба лоластон,
Ҳар лола як пиёлаи паймонаст.
Ранги дигар маҷӯй аз ин лола,
Якранг чун шаҳодати Нӯъмон аст.
Ҷони ҷаҳон ба домани ту бастаст,
Имрӯз, ки ҷаҳонт ба фармон аст.
Милоди ту валодати фарҳанг аст,
Оғози ту муқаддами Зарвон аст. 
Рӯзи заволи салтанати зулмат,
Рӯзи ҷалоли Оли Хуросон аст.

Худойназар Асосзода

Худойназар Асозода, профессор, доктори илмҳои филологӣ, мудири кафедраи назария ва адабиёти навини форсии тоҷикии ДМТ беш аз панҷ ҳазор нусха китоби шахсии худро, ки дар тӯли панҷоҳ соли фаъолияти омӯзгорӣ гирд овардааст, ба китобхонаи ДМТ тақдим намуд.

"Ӯ оламеро бо худ бурд, ки аломате аз ин олам дар ҳар муддаӣ дида намешавад".

Рӯҳаш  шоду  хонаи охираташ обод бошад ин марди бузургро.
Дарсе устоди мо Асозода гузашт:
Озода ҳамезисту озода гузашт.
Бунёди Адабсарой(1) бинҳод ба пой,
Дар роҳи адаб зи по науфтода гузашт.
________
Адабсарой – Махзани адаб, ки устод Асозода аз ҳисоби китобхонаи шахсии худ дар Донишгоҳ ташкил намуд.

АСМО

То гули рухсори ту дар боғи чашми мо шукуфт
Сад биҳишти нақд дар домони ин руъё шукуфт.

Ғунчаи дил, то куҷо барбастаӣ чашм аз ҷаҳон,
Ё ба пои зиндагӣ уфтод бояд, ё шукуфт.

Қатраи беҳосиле буд ин дили бемуддао,
Акси чашмат то дар ў уфтод, сад дарё шукуфт.

Шодхорони ту ҷомеро ба санги мо заданд,
Аз вуҷуди хораи мо оламе мино шукуфт.

То ба авҷи рози иллаллоҳ роҳе шуд падид,
Ҳар қадам то арши аъло лолаҳои ло шукуфт.

Аз биёбони ғамат бигзашт оҳуи хаёл,
Чашмаҳои оби ҳайвонаш зи нақши по шукуфт.

Дар Китоби Сурхи дил кардам гули номат ниҳон
Оҳ базрашро парешон кард, то Асмо шукуфт.
Марти 2011

БО МО

Фалакро хашми пинҳонест бо мо,
Ҷаҳонро кини сӯзонест бо мо.

Гаҳе дар об дорад, гаҳ дар оташ,
Замонро давру давронест бо мо.

Бирав эй дев, девонат фурӯ шӯй,
Ба лавҳи сина Қуръонест бо мо.

Мазан моро ба санги камбаҳоӣ,
Кӯҳистоне, Бадахшонест бо мо.

Магар бо зулфи худ паймон бубастӣ,
Туро аҳди парешонест бо мо.

Зи ҳамчашмӣ ҳама тарфе, ки бастем
Ҳамин як чашми ҳайронест бо мо.

Бирезад то ба домони Бухоро,
Ҳамон дасти Зарафшонест бо мо,

Ҷавоби он атоҳо Рӯдакиро
Ба поси Оли Сомонест бо мо.

Агарчи доманат аз даст додем,
Ба ҷубронаш гиребонест бо мо.

ДАР ОСТОНИ ЗИМИСТОН

Намонд гул ба гулистон дар остони зимистон,
На як ҳазору на дастон дар остони зимистон.
Ба зери пориса гунҷишкҳо чу аҳли дабистон 
Кушода маҳфили чистон дар остони зимистон.
Фиканда ҷома зи тан чун набарда муштзанон аст
Чанори бонии бустон дар остони зимистон.
Ба поси мӯйи сафедаш, сапеду пок навидаш
Зада ба зону куҳистон дар остони зимистон.
Ба паҳлу афтаду хезад, ба бол барф бибезад
Ба боғ зоғ чу мастон дар остони зимистон.
Нишаста об зи фаввора ё ки Гови Заминро
Намонда шир ба пистон дар остони зимистон.
Сапед ранги шакар бин шакарнами саҳариро
Чаман шуда сари Дастон дар остони зимистон.
Фитода ҷоми булурӣ магар миёнаи сангоб
Зи дасти бодапарастон дар остони зимистон.
Хазон бибурд ба ғорат ҳазор рангу аз он беш
Кунун зи оташ бистон дар остони зимистон.
2010

Зимистон

Дар ҷӯй обҳо,
Дар чашм хобҳо,
Дар раҳ шитобҳо,
Дар дил суолҳо
Дар лаб ҷавобҳо
Ях баст
Истод.
Аммо, дареғ, 
Умр
Чун нур
Аз булур
Аз шишаҳои ях
Озод, бедаранг,
Ҳай мекунад убур,
Ҳай мекунад убур.

ДАСТИ ПАДАР

АЗ СИЛСИЛАИ "ТАСБЕҲИ РӯЗГОР"

ДАСТИ ПАДАР
(Нақли падарам)

Бача будем, ки падарамон гузаштанд. 8-сола ё 9-сола будем. Аммаам бисёр вақтҳо бо мо буд. Ӯ одат дошт, ки тамоми рӯз зарфҳоро бо рег дар лаби ҷӯйи калони ҳавлӣ мешусту ба гуфти худаш «қатрон» мекард. Яъне об мегардонд.
Ман бемор будам. Таби баланд доштам. Аз фарти таб шабҳо то субҳ хобҳои ваҳшатнок медидам. Ҳатто рӯзона аз хоб метарсидам. Дар рӯи суфаи пеши хона хобида будам. Тобистон буд ва дар лаби ҷӯйи калони пеши хона аммаам мисли ҳамеша зарфҳоро мешусту қатрон мекард. Ман бо исрор аз ӯ мехостам, ки обам бидиҳад. Вале аммаам ба ман об намедод. Мегуфт таб дорӣ, зиёнат мекунад. Ман аз исрори зиёди бенатиҷа навмед шудам ва дар ҳоли яъс оҳиста-оҳиста садои баҳам хӯрдани зарфҳои чиниву мисӣ бо садои об омехта аз ман дуртару дуртар мерафт. Хобам бурд.
Дар хоб дидам, ки падарам бо ҳамон ҳайате, ки дар ёдам барои ҳамеша нақш бастааст: болобаланд, қавиҳайкал, бо риши баланди аз ду сӯ сафед ва миёна сиёҳ, домани ҷомааш бод гирифта ва ба ду сӯ баргашта, ба шаст аз дарвозаи ҳавлӣ ворид шуд. Фарёд кардам:
- Аво, об!
Падарам рост ба сӯйи ман омад, бо диққат ба рӯям нигоҳ кард ва сатилеро, ки дар канори суфа, дар танаи тут овезон буд гирифт ва ба сӯйи ҷӯйи калони канори ҳавлӣ равон шуд, то бароям об биёрад. Ин лаҳза аммаам, ки ҳамоно дар лаби ҷӯй буд аз ҷой хест ва гуфт:
- Абдулваҳҳоб! Сатилро чӣ кор мекунӣ? Ана ин косаро бигир, – ва ба сӯяш косаи дуғовиро дароз кард. Падарам бо ҳамон шаст баргашту сатилро дар мехи танаи тут овезон кард ва косаро аз дасти аммаам гирифту ба оби ҷӯй зад ва лабрез ба сӯйи ман овардаш.
Ман аз ҷогаҳ нимхез шуда, дастҳоямро аз ду сӯйи коса рӯйи дастҳои падарам гузошта, ҳарисона оби сарди гувороро дам мекашидам. На об тамом мешуд на ташнагии ман. Дар ҳамин ҳол бедор шудам. Нимхез будам ва дастҳоям ба пеш дароз. Ангор, ки ҳанӯз рӯйи косаи об ва дастҳои падарам. Якбора баргаштаму ба танаи тут нигоҳ кардам. Сатил дар ҷояш овезон буд ва гӯё меларзид.
Аз бемории ман ҳеч нишоне намонда буд.
Аммаам ҳанӯз дар лаби ҷӯй зарфҳоро қатрон мекард.

БЕ МАН

БЕ МАН

Боғро дар зар гирифта зарнигорон боз бе ман,
Кӯч баста мурғҳо бар гармсорон боз бе ман.
Дар диёри шедшоне, шохсори гулфишоне
Мерасад бар авҷ гулбонги ҳазорон боз бе ман.
Рӯй сӯйи кӯчаҳои холии деҳи муҳоҷир
Гиря дорад ҷурзи1 пире зери борон боз бе ман.
Чанд барги зарду себи бодрези сурх бар дӯш,
Хонаи дарё раванд он ҷӯйборон боз бе ман.
То сари мардум нагардад аз ниҳеби тирмаҳ хам,
Осмонро шона дода кӯҳсорон боз бе ман.
Боз бе ман, боз бе ман, боз бе ман, боз бе ман,
Ин ҷаҳон будаст гӯё аз ҳамон оғоз бе ман.
_____
1.ҷурз-- дарахти кӯҳистонӣ шабеҳи сада.

ГУЛҲОИ ТИРАМОҲӢ

ГУЛҲОИ ТИРАМОҲӢ

Гулҳои тирамоҳӣ
Падруди офтобанд.
Эҳдои охирини 
Мавлуди офтобанд.

Гулҳои тирамоҳӣ
Рухсора зард доранд.
Аз хори хушки пойиз
Як дарза дард доранд.

Сад чашм интизоранд,
Бар лаб суолу хоҳиш.
Муҳтоҷи як тасалло
Муҳтоҷи як навозиш…

Резанд болу парро,
Дар домани зимистон.
Гулҳои тирамоҳӣ
Дар зери тири борон.