Гулҳои тирамоҳӣ
Падруди офтобанд.
Эҳдои охирини
Мавлуди офтобанд.
Гулҳои тирамоҳӣ
Рухсора зард доранд.
Аз хори хушки пойиз
Як дарза дард доранд.
Сад чашм интизоранд,
Сад лаб суолу хоҳиш.
Муҳтоҷи як тасалло
Муҳтоҷи як навозиш.
Бо нархи ҷон бубахшанд
Эъҷозро таҷассум.
Хандон шаҳиди ишқанд
Аз теғи як табассум.
Резанд болу парро,
Дар домани зимистон.
Гулҳои тирамоҳӣ
Дар зери тири борон.
Комментариев нет:
Отправить комментарий
Нигоҳи шумо!