УСТУРАИ ВИҚОР

Дар сӯги Аслиддин Соҳибназаров

Ойинаи беғубор буд Аслиддин,

Як ояти ошкор буд Аслиддин.

Аз силии боди давр аз по нафитод,

Аз силсилаи Ҳисор буд Аслиддин.

Хандон буду шоду кас надонист ҳаме,

К-аз дарди Ватан фигор буд Аслиддин.

Дандони фалак шикасту ӯ хурд нашуд

Устурае аз виқор буд Аслиддин.

Сад ҳалқаи дор сифр шуд дар пояш

Боло зи сутуни дор буд Асилиддин.

Ҷуз рост нагуфту ҷуз раҳи рост нарафт,

Доро набуду мадор буд Аслиддин.

Бовар накунам, ки душманаш буд касе,

Чун хеш буду табор буд Аслиддин.

Сарсӯхтагон сояи ӯ меҷустанд,

Монандаи шаҳчанор буд Аслиддин.

Давре, ки зи сад ҳазор як кас набувад,

Як тан буду сад ҳазор буд Аслиддин.

Аз санг на, бал зи нанг ҳайкал бояд,

Худ пайкари нангу ор буд Аслиддин.

Бе доъияву намоиши зӯҳду вараъ

Софӣ буду сӯфивор буд Аслиддин.

Чун обу ҳаво, ки напазиранд фишор,

Безор зи ҳар фишор буд Аслиддин.

З-он буд, ки роҳи осмонҳо бигирифт

Бар боли шараф савор буд Аслиддин.

Аз лутфи Худо ҷудо нахоҳад будан,

Бо халқи Худо чу ёр буд Аслиддин.

Васфаш ба шумор адо набитвонам кард,

Бартар зи ҳама шумор буд Аслиддин.

Соли 2006